كتب : عمرو مدحت
تدوال نشطاء على مواقع التواصل الأجتماعى نص مكالمة بين مسعف بهيئة أسعاف دمياط و مدير اسعاف الدقهلية الدكتور هانى جميعه وسط من التعليقات التى تمدح المسعف على ما فعلة من انقاذ أربعة مواطنين أثر حادث أليم .
حيث كتب الدكتور هانى جميعه على صفحتة على الفيس بوك كما يلى …نص المكالمة بدون تعديل
“” جائنى أمس مكالمة ان لم تكن أسعد مكالمة فى حياتى فهى من أسعد المكالمات فى حياتى
مسعف من افضل رجال هذا الوطن يتصل بيا ويعرفنى بنفسه ويقول انا محمد البساطى مسعف فى إسعاف دمياط بتصل بحضرتك عشان افرحك وانسب ليك الفضل بعد ربنا
ارد عليه خير بس يا ا محمد
يقول لى انا كنت ذاهب الشغل الصبح(اول ايام عيد الفطر) فوجد حادثة امامى وسيارة سقطت فى المياة بها 11 مصاب منهم 5 (اريست) (يعنى توقف قلبهم) وبفضل الله افتكرت كلامك وانت بتدرسنا الدورة فى شهر مارس إللى فات و كأنى بسمعك وشريط فيديو امامى بيقوللى اعمل ايه وانا لوحدى الآتى :-
1 استدعاء سيارات الإسعاف وبصراحة جت بسرعه
2 بدأت فرز وتقييم الحالات والناس سايبانى اشتغل وكله بيسمع كلامى
3 بدأت اشتغل مع الحالات إللى (اريست) إنعاش قلبى رئوى cpr واستخدم الاهالى معايا لدرجة ابن واحدة انا بعمل الضغطات وهو قاعد يعيط خليته يعطيها تنفس وقبلة الحياة وبفضل الله آل 5 حالات كلهم رجعوا الى الحياة والقلب اشتغل
4 بدأت أركب المصابين فى السيارات طبقا لاولوية الخطورة
5 كل دا وانا بلبسى الملكى إللى كنت رايح بيه الشغل و اخدته وغسلته فى وحدتى وجه د محمد الطنطاوى مدير إسعاف دمياط وشكرنى
ويقول لى انا بتصل عشان افرحك وانسب ليك الفضل بعد ربنا ف إللى انا عملته “
وقال الدكتور هانى جميعة انه قام بتوجية الشكر للمسعف محمد وقال له كل إللى حصل ليك دا بجهدك وشغلك وتوفيق ربنا ليك كتير بيتعلموا لكن المولى قال ( وتعيها أذن واعية) وانت مش بس وعيتها ولكن نفذتها أحسن ما يكون وكنا بنقول ( ومن أحياها فكأنما أحيا الناس جميعا) انت بينك وبين ربنا ايه عمار عشان يعطيك ثواب أحياء الناس جميعا 5 مرات فى اول يوم العيد
كما قال المسعف انا مش عندى تليفون بيصور ولا ليا فيس بوك ولا غرضى اى شئ بس انا بتصل بيك بس عشان حبيتك وحبيت أشكرك
وشهدت تعليقات رواد الفيس بوك وقاموا بتوجيهة رسائل للمسعف احنا كلنا إللى نشكرك وانت فوق راسنا كلنا وانت نموذج لابد من الاقتداء به وان شاء الله ربنا يكرمك اخر كرم شكرا شكرا جزيلا يا محمد البساطى وشكرا لكل رجل شريف محترم فى مصرنا الحبيبة
وشكرا لكل من ساهم ويساهم فى تطوير هيئة الإسعاف المصرية وأخيرا. (((فيها حاجة حلوة))).
من ناحية أخرى قال الدكتور هانى جميعه انه تم التواصل من قبل السيد الدكتور أحمد الأنصاري رئيس هيئة الإسعاف وذلك لتكريم المسعف محمد السيد عبده البساطى بمقر الهيئة الاسبوع القادم ان شاء الله
