أخبار عاجلة
الرئيسية / مقالات واراء / نصائح مهمة لطلاب الثانوية العامة…بقلم احمد حافظ

نصائح مهمة لطلاب الثانوية العامة…بقلم احمد حافظ

كتب : احمد حافظ

عندك امتحان لغة عربية يوم الأحد ٤ / ٦ إن شاء الله، وعلشان تعرف انت هتمتحن كام سؤال المادة دي، وعلشان تعرف كمان كل سؤال في الامتحان عليه كام درجة بص في الورقة دي.


وعلشان تعرف انت لو حليت كام سؤال ولو محلتش كام سؤال هينقص منك كام درجة.. شوف الورقة دي وركز فيها كويس.. هتلاقي فيها كام سؤال وكام جزئية وكل جزئية عليها كام درجة.
…………………………
عايز أشرح لك حاجات تانية مهمة أتمني تركز فيها.

– في امتحان اللغة العربية وتحديدا سؤال التعبير، عايزك تاخد بالك من حاجة مهمة، إن سؤال التعبير هيكون مقسوم إلى جزئيتين، الأولى تعبير وظيفي والثانية تعبير إبداعي.. وسؤال التعبير الوظيفي هيكون إجباري وعليه 4 درجات.. أما سؤال التعبير الإبداعي عبارة عن موضوعين تختار منهم موضوع واحد وده عليه 10 درجات.

-اكتب موضوع التعبير الإبداعي في 25 سطر اللي هم عبارة عن 6 فقرات علشان تاخد العشر درجات كاملين.. هتقوللي يعني إيه فقرات.. هقولك يعني تكتب سطرين وتحط نقطة والسطرين دول هما “الفقرة الأولى” وبعدين تكتب سطرين أو تلاتة وتحط نقطة ودول هم الفقرة التانية وهكذا لحد ما تكتب 6 فقرات.. بحيث تكون كل فقرة فيها فكرة في نفس الموضوع اللى انت بتكتب فيه.. وفكرة يعني حاجة جديدة تشرح فيها الموضوع اللي بتتكلم فيه يعني متكتبش الـ25 سطر لوكشة واحدة كده.

– بلاش تكتب إجابتين لنقطة أو جزئية أو سؤال واحد علشان هتاخر صفر وبلاش تقول هكتب إجابتين والمصحح هياخد الإجابة الصح.. مش هيحصل.
– خليك مقتنع إن كل سؤال في الامتحان هيتخصص له معلم يصححه، يعني اللى بيصحح التعبير غير اللي بيصحح النحو غير اللي بيصحح النصوص وهكذا.. علشان متتعاملش بمبدأ “لما أحل النحو كله صح المصحح هيديني الدرجة النهائية في التعبير.. الكلام ده مش هيحصل”.

– لازم تفهم كمان إن الامتحان اللي هيكون بتاعك هيكون مختلف عن الامتحان اللي مع زميلك اللى قدامك واللي وراك.. وكل لجنة هيكون فيها 4 نماذج امتحانات.. يعني السؤال العاشر عندك مش هيكون هو نفس السؤال اللي مع اللي جمبك لأ ده ممكن يكون السؤال رقم ٤٠.. بلاش تغش لأنك أكيد هتاخد إجابة غلط لأنها مش هتكون خاصة بالسؤال.. اعتمد على نفسك.

– الأسئلة الاختيارية موجودة لكنها هتكون بنسبة قليلة جدا (يعني لو فيه 11 جزئية هيقولك جاوب على 10 بس) والسؤال الاختياري مش هيكون منفصل لا ده هيكون جوه جزئيات سؤال معيّن علشان متكنش مضطر تقرأ أسئلة الامتحان كله علشان تختار.. مش معقولة هتقرأ 50 سؤال علشان تختار بينهم.. لأ هيجيلك السؤال العاشر مثلا فيه خمس نقط هتجاوب على 4 بس.. وهكذا.

– لازم لازم لازم تحل الأسئلة المطلوبة منك الأول مش تحل كله (إجباري واختياري) لأنك ممكن تتفاجئ إن الوقت خلص وانت لِسَّه قدامك ١٠ أسئلة متحلوش لأنك بتحل الكل (اللي مطلوب منك تحله واللي مش مطلوب) لأ.. بنصحك لوجه الله تحل اللي مطلوب منك فقط الأول ولو عندك وقت اكتب في خانة الملاحظات (إجابات أخرى في المسودة) وفي المسودة دي اكتب رقم السؤال وحلّه، علشان المصحح يديك الدرجة الأعلى، ده لو عندك وقت.

– نلتقي مرة أخرى مع قواعد حل باقي الامتحانات إن شاء الله ناخدها امتحان امتحان.. الله معكم ويوفقكم.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *