أخبار عاجلة
الرئيسية / الدقهلية / شاب ينجح فى حل مشكلة نقل طلاب الجامعة ومرور الدقهلية يسحب أتوبيساته

شاب ينجح فى حل مشكلة نقل طلاب الجامعة ومرور الدقهلية يسحب أتوبيساته

كتبت : شيماء العدل

قام الشاب هادي أحمد 24 سنة بفكرة توفير أتوبيسات خاصة لنقل الطلاب من مدينة دكرنس إلى الجامعة والعكس ، لمساعدة الطلاب وتوفير المواصلات والانتقال الآمن لهم ، وبمقابل مادي 210 جنيه في الشهر بما يوفر عبء مادي علي الطلاب.

قال هادي ل “المنصورة توداي ” أنا شاب خريج كلية تجارة وطبعا مفيش شغل وأنا ورثت عن والدي الله يرحمه شركة اتوبيسات الشركة دي متأسسة من حوالي 30 سنة ، كان شغلها إنها توصل اللي مسافرين السعودية والأردن عن طريق المواني زي سفاجا والغردقة ونويبع أو حد بييجي يأجر الباص لرحلة .

وأضاف ” بعد الثورة الشغل دا قل جدا و مبقاش فيه حد بيروح ولا ييجي أصلا ، كنت انا وقتها في الجامعة ، وكنت بعاني من المواصلات وبتخانق علشان اركب وكانت المواصلات بهدله جدا ، ومن هنا جات فكرتي إن استخدم باصات الشركة في إنها توصل الطلبة من دكرنس لجامعة المنصورة والعكس باشتراك شهري رمزي يوفر للطالب عن المواصلات ونوفر ليهم الراحة والوقت ، وخدمة تليق بطلبة جامعيين .

وواصل “بدأت معايا ب 150 طالب وكل سنة كانت الشركه تتحسن عن اللي قبلها والطلبة بتزيد وعجبهم النظام لغايه ما وصلت ل 2000 طالب ودا بفضل الله ثم تعبنا ومجهودنا واحترامنا للناس ، ومن هنا بدأت مشاكلي مع شرطة مرور المنصورة بالتحديد وهي دي المشكلة الأساسية أنهم من 3 سنين كانوا بيوقفوا الباصات يأخدوا الرخص ويعملوا مخالفتين حموله بالأجر وتجوال داخل المدينة ، وهذه المخالفات غير صالحة لباص مرخص رحلات لأن الرحلات لها الحق أن تدخل أي مكان غير الأماكن السياحية وحمولة بالأجر طبعا مفيش الكلام دا لان الناس اصلا مشتركه بالشهر ” .

وأكد هادي أنا كنت بدفع مخالفات حوالي 4000 أو 5000 كل شهر لأنهم 15 باص ، ولكن ماحدث هذا العام شئ غريب فالمرور بيوقفوا الباص وينزلوا الطلبة ، ويطلع أمين الشرطة يقوله ودي الباص المرور ، أنا رخصي سليمة ومعايا تراخيص وكل حاجة معايا سليمة ليه ومش قادر أعرف أنا الباص بتاعي بيتسحب ليه ، ولحد دلوقتي اخدوا 5 باصات وطلبوا مني مدخلش من المدينة وبدخل من على الدائري بتاعها وانزل الطلبة بعيد عن الجامعة وهما مستحملين محدش بيتكلم علشان عارفين انهم مش بتوع بهدلة ” .

وطالب “هادي “المسئولين بحل المشكلة لأن هناك أكثر من 30 أسرة يعملون بالمشروع ، ومن الممكن أن تتشرد بيوتهم في حالة وقف المشروع.

14 تعليق

  1. دى مش جديده اكيد فيه حد له مصلحه ف كده واكيد الحد ده مسنود على واحد مسؤل فاسد من كتير موجودين ف البلد احنا عندنا طلبه عايزين نشعر اننا بشر مش حيوانات ياريت المسؤولين يتحركو

  2. مش فاهمين ك طلبه ايه وجه الاستفاده من كل اللي بيحصل دا والله مع ان الورق سليم يعني وبنتمرمط وبنمشي كتير جدا بعد اللي حصل دا وهنتمرمط اكتر لو الموضوع دا استمر والشركه قفلت حقيقي لا هنلاقي مواصلات تكفي عددنا ولا سواقين المكروباصات بيحترمونا اصلا والشركه كويسه جدا معانا وعامله اللي عليها وزياده وكفايه ان أهالينا بيبقوا مطمنين علشان عارفين هنروح ازاي واحنا بنبقي ضامنين اننا هنروح واننا في مسؤليه حد والشركه مقصرتش الحقيقه وياريت المشكله تتصعد وتتحل في اقرب وقت

  3. مفيش مقارنه بين الشركه والمواصلات كفايه اننا ضامنين مكان لينا من غير بهدله مش بنقف ب ال3 ساعات عشان نلاقى مواصله وفالاخر نقعد مزنوقين ومش عارفين نتحرك دا غير المعامله المحترمه اللى تليق بطلبه جامعيين ومفيش استغلال للظروف انت ديما بتفكر ف ظروف الطلبه واللى يريحهم وان شاء الله تعبك ومجهودك مش هيروح لان فعلا محدش بيتعب ف شغله ادك ربنا يقويك

  4. الباصات دي وفرت علينا كتير وصامنين اننا راجعين بيتنا احنا كنا بنتبهدل في المواصلات وموش بنلاقي اصلا ممكن افضل من اساعه 2ل7 عشان اركب وساعات بنفضل ازيد انما الباصات ضامنين رجعنا
    الباصات مريحه ربنا ومافيش بهدله انتو حابين تبهدلونا ليهوشركة فؤادكوا من احسن الشركات الموجوده واحسن معامله وكل حاجه حلوه ناس محترمه ومعاملتهم محترمه ليه تعملوا كدا وتقطعوا عيش ناس محتاجه عشان تعين بيتهاوولادها وراعوا ظروفنا وخوف اهلنا علينا بيبقوا مطمنين واحنا في الباص انما مواصلات بيبقوا قلقالين وقاعدين مش ع بعضهم من الخوف اعتبرونا ولادكوا

  5. يعني يوم م حد يعمل حاجة كويسة ف البلد دي تعاملوه كدا
    كفاية أنها مواصلة مضمونة بنلاقي فيها الراحة لو حد عايز يذاكر حاجة بيذاكرها ودا طبعا مستحيل يعرف يعمله ف أي مواصلة تانية
    بجد شركة فؤادكو مش بس حلت مشاكلنا احنا الطلبة
    بالعكس حلت مشكلة كبيرة جدا ف البلد
    يعني لو ال2000طالب دول وقفوا ينتظروا المواصلات والله الطرق هتتقفل من الزحمة
    أنتم ليه بتقفوا عائق ف طريق النجاح ونهضة البلد
    دا بدل م تساعدوهم والي زيهم
    ارتقوا شوية يا بلد الوسايط والرشاوي

  6. بصراحة الباصات دى مريحانا جدا كطلبة ماديا لان الاشتراك اقل من المواصلات بكتير و كمان الباص مريح جدا و بنبقى ضامنين مواصلة توصلنا و مش بنقف بالساعات علشان نركب و بنروح و بالنسبة للبنات فمفيش امان اكتر من الباص لان مفيش ولد بيقعد جنب بنت و باب الباص مقفول علينا و السواقين محترمين جدا معانا و المعاملة كويسة و محترمة جدا سواء من هادى صاحب الشركة او المشرفين او السواقين نفسهم ، و مواعيدهم ديما مظبوطة و موفرة علينا وقت و مجهود و الباص وسيلة نقل محترمة تليق بطالب جامعى فعلا ، و هما بيقدرونا جدا و بيخافوا علينا ، مظنش لما تهاجموا الباص بالطريقة دى هتقدروا توفرولنا حاجة قريبة منه فى المستوى ، دا كفاية السرفيسات المهكعة اللى فى المنصورة و اللى محدش بيعرف يركبها بسهولة و لا استغلال السواقين فى الموقف و الظلم و القرف اللى بنشوفه فى المواصلات العادية ، اعملولنا حاجة واحدة بس كويسة و سيبولنا الباص
    ارتباطنا و حبنا للشركة اكبر بكتير من مجرد وسيلة مواصلات محترمة

  7. الشركه موفره عليينا كتيير ولو نزلنا موصولات يا تري الحكومه هتقدر توفر الميكروباصات لعدد 2000طالب معتمديين ع الشركه دي …ارجكوا كفاويه وبلااش بهدله اكتر ف البلد ياريت يحاول يشووف مشكله الطرق. الي بيحصل عليها حادثه اسبوعياا بدل الموصلاات دي ..وكماان التكاتك الي بقت كتيير ومش محدود عددها دي بجد فحراام احنا مبنعرش نمشي فالمسؤليين سابو كميه المشااكل دي ومسكوا ف الشركه وموصلات الجامعه

  8. بصراحة الباص ده من غيره مش عارفة احنا كبنات هنروح و نيجي ازاي بجد تجربة المواصلات دي كانت مرة واحدة ف اول سنة ليا ف الجامعة و حلفت من بعدها اني مسافرش تاني لولا الباص ده اما قولت اجربه مكونتش عارفة اروح و اجي ازاي
    قمة الاحترام من سواقين الشركة و من المسؤلين
    مبلغ صغير مش طماعين زي ما كل الناس بقت طماعة ف البلد
    هو لازم كل حد بيعمل حاجة حلوة تطلعوه مخالف و تاخده عليه فلوس بالعافية
    الحكومة،نفسها موفرتش مواصلة محترمة لطلبة جامعين محترمين نازلين يتعلموا مش عما يوصلوا الجامعة يكونوا خلاص تعبوا و عايزين يروحوا من تكسير الطريق ف المكروباصات

  9. وليد محمد

    الموضوع فعلاً يحتاج لحل، الشركة تؤدي خدمة كبيرة للطلاب والعاملين من دكرنس بجامعة المنصورة، والمواصلات العادية خلال السنوات الماضية لا تقدر على استيعاب كل هذه الأ‘عداد من الطلاب التي تسافر يومياً للجامعة.

  10. مش عارفه يعني نعمل ايه للدوله ولا للمرور دا شخص مجتهد ومحترم جدا هو وكل الاستف الي معاه من سواقين لمشرفين بنروح الجامعه وبنروح لبيوتنا واحنا محتفظين بكرمتنا لبنقف ساعات علشان بس نركب السرفيس ودي المواصله الداخليه وما ادراكم بالي بيحصل فيها من قله ادب وانتهاك لحققونا بكل الطرق والدوله عارفه دا ومش قادره اصلا توفر حتي الخدمه السيئه دي لباقي الناس …مبالكم كمان بالمواصله لحد لغايه بلد كل واحد سلسله من الاهانه وقله الادب علشان اوصل بيتي …الباص دا موفر علينا كتييييير جدا مجهود وفلوس ووقت وبيوفر لينا احترام …يرايت بجد يبقي في حل هو معملش مصيبه دا بدل ما الدوله تساعده

  11. الباص ده من اهم الحاجات ف يوم ولادنا و من غيره ولادنا هيتبهدلوا في المواصلات و مامنش لبناتنا تركب ف المواصلات دي الي كلها قلة ادب و سفالة من سواقين و قلة كرامة لطلبة جامعين محترمين الي منهم كمان سنة و اتنين هيبقوا دكاترة و مهندسين و اساتذة و كلهم ناس محترمة و تعامل الشركة مع الاولاد ف غاية الاحترام و موفرعلينا كاهالي عبء كبير ف خوفنا عليهم و هما كل يوم مسافرين ع الطريق و كمان المصاريف بتاعة السفر كل يوم
    نرجو الاهتمام و التوصل لحل

  12. اولاا مفيش اى مقارنة بين الشركة دى و المواصلاات
    رغم ان الناتج واحد .. اننا كطلبة نوصل ..
    بس ماشي .. اولاا أمن و امان و راحة كبيره جداا جداا و توفير تعب و تكاليف غير الاحترام الى بنشوفة بجد .. دا حاجة تانية و غيره عن الموضوع دا كتير
    بس بجد الشركة دى مستاهلش كل البهدلة الى بتحصل د..

  13. الباص بيريحنا جدا عن المواصلات وبيريح الدوله بردة لو حد يس يشوف الزحمه اللى عند جيهان هيدخلو بدل الباص الف عشان يخفو الزحمه دى يعنى المنع دة هيخلى الكل متضرر

  14. Dr. Muhammad Nour

    أرى .. استعن بالله خد ورقك وادخل على المحافظ شخصيا
    لدعم مشروعك ..شركتك فكرة جيدة ومشروع رائع ويعتبر نواه لتأمين
    (النقل الطلابي بمحافظة الدقهلية )
    المحافظة تحتاج التوسع في هذا النوع من الخدمات الطلابية بعيدا عن معاناة الطلاب مع الوسائل الأخرى
    ومن المناسب دعمها وتشجيع غيرك للتقدم بشركات مماثلة بالتنسيق مع المحافظة..بالتوفيق.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *