بقلم:أحمد حافظ….الصحفي بالأهرام
قبل ما تطالب باستقالة وزير التعليم بسبب ارتفاع كثافة الفصول، وجه كلامك لرئيس الحكومة والبرلمان ورئيس الجمهورية نفسه: فين الـ200 مليار جنيه اللي محتاجهم وزير التعليم علشان يبني 280 ألف فصل جديد لمواجهة ارتفاع الكثافة.. وقبل ما تحاسب وزير التعليم على ضعف مستوى بعض المعلمين حاسب اللي أخد قرار بتعيين آلاف المعلمين بعد ثورة يناير وغالبيتهم بدون مؤهلات تستحق أن يؤهلم للعمل في مهنة التدريس وبعضهم من حملة الدبلومات، وقبل ما تحاسب وزير التعليم على ضعف رواتب المعلمين اسأل رئيس الحكومة ووزير المالية عن هذه الزيادة.. وقبل ما تحاسب وزير التعليم على تأخر وصول الإنترنت للمدارس حاسب وزارة الاتصالات المسئولة عن ذلك.. وقبل ما تحاسب وزير التعليم على الفساد والمحسوبية وجه كلامك للجهات المنوط بها تطهير المؤسسات التعليمية من الفاسدين.
قبل ما تحاسب وزير التعليم على مدير المدرسة الحرامي والمرتشي واللي بينهب في جيبه حاسب الجهة اللي عينته في المنصب ومسئولة عن متابعته في المحافظة.. وقبل ما تحاسب وزير التعليم عن الدروس الخصوصية حاسب المحافظين اللي منفذوش قرار الوزير بغلق السناتر وشمعوها بالشمع الأحمر.. وقبل ما تحاسب وزير التعليم عن هلاك المدارس وخطورتها على الطلاب اسأل رئيس الحكومة نفسه: فين الفلوس اللي حضرتك مخصصها لهيئة الأبنية التعليمية تكفي صيانة 50 ألف مدرسة.. وقبل ما تحاسب وزير التعليم على مدير إدارة تعليمية فاسد حاسب اللي اختاره للمنصب ولاعلاقة للوزير بهذا القرار.
كل وزراء التعليم السابقين رحلوا بسبب نفس الكلام، لأننا كمجتمع كنا بنحاسبهم على كل حاجة ومش بنحاسب الكبار.. لما تكون الدولة موفرة 80 مليار جنيه ميزانية لوزارة التعليم كل سنة، بيروح منها 86% مرتبات معلمين وموظفين، قوللي الوزير، أي وزير بقى، هيعمل إيه بـ15% من الفلوس.. هقول تاني: لو عايزين تطوير تعليم يبقى توجه كلامك للكبار في البلد دي، ويكونوا أول ناس في وش المدفع ويحسوا إنهم المسئول الأول عن تدهور التعليم، لما تقول إزاي الطالب يقدر يتعليم في فصل فيه 100 طالب يبقى كلامك مش لوزارة التعليم، إنما للجهة اللى بتقول لوزير التعليم مفيش فلوس لبناء مدارس.
حاسبوا وزير التعليم على سياسته التعليمية، على أفكاره، على الحاجات اللي تخصه وأخد قرار فيها، مش تحط عليه وتحاسبه على حاجات مش من تخصصه.. على بناء مدارس وصيانة مدارس وزيادة مرتبات وكشف فساد وإقالة معلمين فاشلين وغلق السناتر.. وجه كلامك ونقدك وهجومك للمسئول الحقيقي وحاسب الوزير على اللي يخصه.. طول ما عندنا مسئولين لاقيين اللي يشيل الليلة ويكون في وش المدفع مفيش حاجة هتتغير، مفيش جديد هيحصل، مفيش تعليم هيتطور، مفيش مدارس هتتبني، مفيش فساد هينتهي، مفيش معلمين محترمين هياخدوا حقوقهم، مفيش أي حاجة هتحصل.
طول المتهم الحقيقي بعيد عن النقد والهجوم يبقى مفيش حاجة هتتغير، وجهوا كلامكم للمسئول اللي في إيده القرار، في إيده يعطي ويمنع، في إيه يبني أو ما يبنيش، في إيه يزود أو ما يزودش.. حاسبوا الوزارة على أخطاء وتقصير يخص حدود وظيفته.. لو عايز إصلاح تعليم بجد كل المؤسسات مسئولة من رئيس الجمهورية لحارس الأمن في المدرس، لكن تطالب وزير التعليم بالاستقالة وتحاسبه على مشاريب غيره تبقى غلطان.. هل الوزير ملوش أخطاء؟ طبعا له أخطاء، بس في حاجات تخص أولويات وقرارات وسياسات هو مسئول عنها.
لو حضرتك هتعتبر كلامي دفاع عن وزير اعتبره، لو هتعتبره كلمة حق برضو اعتبره، هحترم رأيك أيا كان كلامك المهم إنك تحترم إن ده رأيي الشخصي، بس اللي عايزك تاخده في اعتبارك، إن دي الحقيقة، وطول ما احنا بنركز النقد والهجوم على شخص وليس مؤسسات، يبقى محدش يفكر لحظة إننا هنتقدم في التعليم خطوة.
اقتنعت أو لم تقتنع، فلك كل الاحترام.
