كتبت : نورهان خالد
تداول نشطاء موقع التواصل الاجتماعي في مدينة المنصورة ، فيديو اعتداء رجل على طفل عمره 8 سنوات داخل أحد المولات. وقال الطفل سامح الذي تم الاعتداء عليه من قبل رجل داخل ماركت بالمنصورة لـ”المنصورة اليوم “بابا شغال سايس عربيات وكان بيكشف على إخواتي عند الدكتور، وقالي خلي بالك لحد ما أرجع وواحد جه تبع جراج عمارة عايز يدخل لقيت عربية قافلة الطريق، دخلت لصاحب العربية بقوله بعد إذنك حرك العربية عشان نوسع الطريق راح ضاربني بالقلم على وشي”. وتابع: “اتصلت بـ بابا وبلغته باللي حصل وخليت صاحبه يكلمه عشان يتابع معايا.. بس لما ضربني الراجل الكبير أنا عيطت ومشيت من قدامه”. وكشف محمد الصاوي والد الطفل سامح، في تصريحات لـ”المنصورة اليوم“أنا كنت خارج المنزل أثناء حدوث الواقعة، فتلقيت اتصال من سامح بيكلمني من تليفون واحد صاحبي هو بيعيط ومنهار وقال لي في راجل ضربني، فكلمت صاحبي وبلغته يروح معاه شوف مين اللي ضربه مكنتش متوقع إنه رجل كبير هو اللي ضربه، ولما صاحبي راح يتكلم معاه في الشارع وهما بيتكلموا معه”، . وتابع حديثه: “لما رجعت البيت لقيت ابني نايم تعبان سألته أيه اللي حصل قالي في واحد ضربني في أوكازيون وجبت الفيديو من الكاميرات لقيت فيديو ضرب سامح وحاجه مهينة جدا.. أنا بستغرب ايه اللي يخلي راجل زي ده يضرب طفل 9 سنين بالقسوه دي”. وأضاف: “أنا مجاش في دماغي أن ضربه بكل القسوة دي، ابني غلط في ايه قاله ممكن تشيل العربية عشان ناس تعرف تتدخل الجراج، أنا كنت ناوي أسامح وأنسى لولا أن شوفت الفيديو وشوفت ضربته لابني بكل القسوة”. وأستكمل: “بعد الواقعة توجهت إلى قسم ثان المنصورة وحررت محضر، وأخدوا أقوال سامح ابني ولكن المحضر بدون اسم، ولابد من وجود اسم الشخص اللي ضرب ابني حتى لا يتم حفظ المحضر.. بس أنا مش هسيب حق ابني وحق أي طفل بيضرب بكل هذه القسوة”. وفي السياق ذاته، قالت مروة ماهر التي نشرت الفيديو على صفحات التواصل، في تصريحات لـ”المنصورة اليوم”: “الطفل بعد الواقعة كان منهار بسبب ما حدث له، وتحدث لنا بقهر أنا عملت أيه عشان يضربني كده”، مضيفة: “لما لقيت الطفل منهار من البكاء سألته ايه اللي حصل قالي راجل ضربني ولما خرجنا نسأله ضربته ليه زعق ومشي نزلت المقطع على مواقع التواصل.
التعليقات متوقفه